el rencor que manca

Como un llobu mansu, a veces prestábanos correr a guardanos na lluriga pa devorar solos el nuestru rencor, la nuestra rensía más íntima. Escomenzaríamos quitándo-y el pulgu col que lu tapa la vergüenza, pa dir a modu esgayándolu colos caniles hasta algamar el corazón y come-y l'alma. Bien a menudo escribimos porque manca el rencor.

Después d'años a saltu de mata, aquel yera'l primer trabayu con nómina y horariu. Los xefes, dos amigos a los que-yos agradecía el que cuntaran conmigo pa la so aventura empresarial. A lo llargo de seis meses fice tolo que fui quien por corresponder al so enfotu en mi y de la meyor manera que supe. El día nel que tocaba renovar el contratu o terminar la mio relación llaboral cola empresa, los dos amigos llamáronme a capítulu y ensin venir a cuentu echáronme en cara una serie de deficiencies na organización del llabor y del míu en particular que m'abultaron tremendamente inxustes, nin de llonxe s'asemeyaben a la relalidá. Atendí pa ellos hasta que se desfogaron a gustu y enantes de que la entamaran a cuentu del mio futuru na empresa, defendime de les acusaciones, ensin munchu procuru, y pidí el finiquitu. 

Alcuérdome que yera un meudía de primavera -sería per abril o mayu- y que en firmando los papeles del autodespidu sentí una allegría tan fonda que me daben ganes de poneme a cantar, nun sé, una asturianada o una ranchera, al altu la lleva. Salí d'aquel edificiu de chusca fábrica contemporána, dedicáu a guariar el ñeru d'empreses de nueves tecnoloxíes, como si en vez de pies tuviere ales d'avión supersónicu o ruedes de bólidu de Fórmula 1. El soleyín frescu convidaba a siguir la so reguera dorada pelos caminos del mundu y veníame a l'alcordanza aquel poema de Rimbaud nel qu'empondera el salir una mañana lluminosa a andar camín ensin destín a dayures, el sudu enfrescáu pol aire amigu, feliz y puru como una rapaza ensin compromisu. Andé los tres o cuatro kilómetros que separtaben el sitiu onde acababa robrar el mio futuru inciertu de la estación de tren más allegada, la de Llugones, y pa mi que fice'l camín en media hora o poco más, embaláu pola euforia, a pasu de lexonariu o de corredor de maratón. Dexaba detrás el futuru inmediatu -que me daba un pizcu de tremesina nes pates- y un curiosu depósitu de rencor -qu'agora dexara de pesar nos costinos y royer nes coraes-. Saqué'l billete a Xixón como'l que saca pasaxe al paraísu o al fin del mundu, cola mesma cachaza. 

Venti años después, acuerdo toles mañanes embaxo'l mesmu cielu que m'acobiyó en dexando el mio primer trabayu estable, en Xixon, y que diba siguir acobiyándome, de día y de nueche, de toles mios aventures infortunaes. Equí embarrancamos pa bien y pa mal, ensin saber como dexar pa prau el rencor que manca.